Mu muhango wo gufungura inama yiga ku iyerambere ry’urwego rw’imari n’imitangire ya serivise hifashishijwe ikoranabuhanga yiswe “Inclusive FinTech Forum”, Perezida Paul Kagame yahishuye ko guhererekanya amafaranga kuri terefone byashyize urwego rw’imari rw’Afurika ku rundi rwego.
Muri iyi nama irimo kubera muri Kigali Convention Center, kuva ku wa 24-26 Gashyantare 2025, Perezida Kagame yagize ati “Mu myaka ishize, ibigo bitanga serivisi z’ikoranabuhanga byikubye gatatu. Ibi bigo byahinduye urwego rw’imari by’umwihariko binyuze mu kohererezanya amafaranga kuri terefoni.’’
Perezida Kagame yahereyeho gukebura ba rwiyemezamirimo bo muri Afurika ko bakwiye gutekereza byagutse mu cyerekezo gikwiye.
Ati “Abaturage bacu bakiri bato ni gihamya ko Afurika ishobora guhangana n’Isi ndetse ikihangira ibishya.’’
Ni mu gihe Evelyn Kaingu, Umuyobozi w’ Ikigo Lupiya gikoresha ikoranabuhanga ry’ubwenge bukorano mu gutanga inguzanyo no kwishyurana, yavuze ko yagitangije mu gufasha urubyiruko rutabonaga ingwate.
Ati “Njye na mugenzi wanjye dukoresheje 500$ twatangije iyi gahunda yo kubaka banki izajya ifasha abakora ishoramari rito kubona inguzanyo, ishoramari no kwishyurana.’’
Umunyamabanga Mukuru w’Isoko Rusange rya Afurika, Wamkele Keabetswe Mene, we yashimiye u Rwanda uburyo rwumvise vuba icyerekezo Afurika yifuza mu ikoranabunga ndetse rukaba bandebereho ku bindi bihugu bigize uyu mugabane.
Yagize ati “Mu mwaka ushize, nasuye u Rwanda inshuro esheshatu kandi impamvu yabyo iroroshye kuko iki gihugu imvugo yacyo ni yo ngiro.’
Iyi nama yiga ku iterambere ry’urwego rw’imari n’imitangire ya serivisi zifashishije ikoranabuhanga yitabiriwe n’abasaga 3000 barimo abayobozi mu nzego zitandukanye, abashoramari na ba rwiyemezamirimo mu rwego rw’imari muri Afurika.
Oswald Niyonzima