Ubuyobozi bw’akarere ka Gicumbi buvuga ko bimwe mu byatumye aka karere kaza imbere mu igwingira harimo ubusinzi by’umwihariko kunywa inzoga zitujuje ubuziranenge, ndetse no kutamenya gutegura indyo yuzuye, aho byabaye ngombwa ko hategurwa ubukangurambaga bwo kwigisha kwita ku mirire no kurwanya ibitujuje ubuziranenge.
Bamwe mu batuye mu murenge wa Kageyo bavuga ko inzoga zitujuje ubuziranenge zari zibiciye imiryango.
Uwajeneza Liberata ati: “ugasanga umugabo akoreye amafaranga akigira muri ayo mayoga ntamenye guhahira umuryango, ntamenya ko umwana akeneye amata cyangwa imboga akikunda.”
“abagore banywaga ibyuma byabateraga gusambana, kuko iyo babaga banyweye ibyo biyoga ‘controle’ yaburaga, ugasanga bariyandaritse, umwana yonsa akamugaburira bya bisindisha yanyweye ugasanga umwana akuranye ubuzima butameze neza.”
Munyakazi Anastase ati: “abanywaga biriya biyoga wabonaga nta mbaraga bafite barabaye ba zezenge , ukajya muri ibyo bishuko byo kwinywera ibyo biyoga abana ntubahahire ntubatangire mitiweli, ntibagire ubuzima bwiza ntibakure neza, abagore bazinywaga wasangaga bataye ubwenge bagenda begama kuri iyo mihanda byari bitubereye bibi.”
Umuyobozi w’akarere wungirije ushinzwe imibereho myiza y’abaturage Mbonyintwari Jean Marie Vianney avuga ku bushakashatsi bakoranye na Duhamic-Adri, ati:
“Twaje gusanga ubusinzi mu miryango ari kimwe mu bituma abana babigenderamo bakagwa mu igwingira, ugasanga umugabo yabaswe n’ubusinzi, kurera abana byahariwe abagore gusa, ziriya nzoga zitujuje ubuziranenge, cya kigage cyacu baracyangije bavangamo ibindi, za nzagwa bavangamo ibindi hanyuma bikica abaturage bigatuma abana bagwa mu igwingira.”
Avuga ko muri aka karere ibyo kurya babifite, ko uretse ubusinzi ibibazo bindi byatumye habaho igwingira harimo kuba abaturage bafite ubumenyi buke bwo gutegura imirire ndetse no kwita ku mugore utwite kuko igwingira ritangira umugore agisama, bikaba byarafatiwe ingamba.
Ati: “Umugore utwite turifuza gushyiramo imbaraga nyinshi cyane cyane uhereye kuri ya miryango itishoboye aho usanga umugore utwite atabasha kubona ibyamufasha, nyuma rero yo kugaragaza ko hari bike ashobora kwifashisha nk’ibikomoka ku matungo, imboga, turifuza ko twigisha abaturage bakamenya ko bitari kure yabo.”
Akarere ka Gicumbi mu bushakashatsi bwa DHS 2025 kagize umubare munini w’abana bari mu igwingira, aho kari kuri 38.8%, bikaba byaratumye bafata ingamba zirimo n’ubukangurambaga bari gufatanyamo na ‘World Vision’ mu isuku n’isukura, mu mirire ndetse bakagera no mu miryango bayikurikirana.
Naomi Irakoze Mugaragu.